UMHVERFISSKÝRSLA TOYOTA Á ÍSLANDI 2018

KOLEFNISHLUTLAUS STARFSEMI TOYOTA

Klappir grænar lausnir hafa vottað að starfsemi Toyota er kolefnishlutlaus. Tekið er tillit til allra þátta starfseminnar t.d. eldsneytisnotkunar, ragmagns- og heitavatnsnotkunar og ferðalaga. Við útreikning á nettólosun frá starfsemi fyrirtækisins munar mestu um samstarf við Skógræktarfélag Íslands um Toyotaskóga sem vinna gegn gegn kolefnislosun frá starfseminni og hafa gert undanfarna áratugi. Kolviður sem notar viðurkenndar aðferðir í kolefnisjöfnun hefur staðfest að framlag Toyota fyrir árið 2018 kolefnisjafni alla starfsemi félagsins.

UMHVERFISSTEFNA TOYOTA

Við höfum einsett okkur að vera í fararbroddi fyrirtækja á sviði umhverfismála hér á landi og til að ná því höfum við tekið upp ISO 14001 staðalinn fyrst bílaumboða hér á landi.

Sem einn stærsti bílaframleiðandi heims telur Toyota það skyldu sína að þróa leiðir til að draga úr þeim áhrifum sem framleiðsla og bifreiðanotkun hefur í för með sér. 
Toyota hefur nú þegar brugðist við þeim umhverfisvanda sem við stöndum frammi fyrir með tvíþættum hætti. Annars vegar nýtir fyrirtækið sér þá þekkingu sem það býr yfir til að framleiða bíla sem minnka álagið á umhverfið og ganga ekki frekar á auðlindir jarðarinnar en orðið er. Hins vegar heldur fyrirtækið áfram þróun sinni á hátækni og rannsóknum á nýjum orkugjöfum sem nýtast munu komandi kynslóðum.

Boðorðin okkar eru:

• Tökum tillit til umhverfismála í allri starfsemi okkar og vinnum í anda sjálfbærrar þróunar. Þannig stuðlum við að betra umhverfi.
• Tryggjum að öllum lagakröfum á sviði umhverfismála verði fullnægt og munum setja okkur strangari kröfur þar sem við á.
• Förum að kröfum ISO 14001 staðalsins og bætum stöðugt virkni umhverfisstjórnunarkerfisins.
• Leggjum okkur fram við að efla umhverfisvitund starfsfólks og áhuga þeirra á mikilvægi umhverfismála með reglulegri þjálfun.
• Einsetjum okkur að vera í fararbroddi fyrirtækja í öryggis og umhverfismálum.
• Leggjum áherslu á góða umgengni við umhverfið, endurnota og endurvinna það sem fellur til í rekstri eins og hægt er en farga öðru á viðeigandi hátt.
• Rýnum umhverfisstjórnkerfi okkar árlega og setjum okkur ný markmið í framhaldinu til að þróa og bæta umhverfismál okkar.
• Nýta rafrænar lausnir til að minnka notkun á pappír.

SAMSTARF Í UMHVERFISMÁLUM

Endurheimt votlendis

Almennt er viðurkennt að losun gróðurhúsalofttegunda af mannavöldum leiði til loftslagsbreytinga og hlýnunar jarðar. Losunin er margvísleg og uppruni hennar er víða.
Athyglin hefur gjarnan beinst að losun gróðurhúsalofttegunda með útblæstri bíla og hafa kröfur innan Evrópu gagnvart bílaframleiðendum um minni losun vaxið jafnt og þétt að undanförnu. Frá 2014 hefur EURO 6 staðallinn um útblástur frá bílum verið í gildi.
Nýir bílar sem seldir eru á Íslandi verða að hafa útblástur samkvæmt staðlinum og menga því minna en eldri bílar.

Því er ekki að leyna að athyglin hefur síður beinst að öðrum greinum samgangna, stóriðju og landbúnaði. Nýlega hefur um- ræða um losun gróðurhúsalofttegunda frá framræstu landi aukist og bent hefur verið á að með því að endurheimta framræst land megi draga verulega úr losun gróðurhúsalofttegunda. Af nógu er að taka því framræst land á Íslandi, sem ekki nýtist í landbúnaði eða skógrækt, er rúmir 3.400 km² og lengd skurða sem grafnir hafa verið til að ræsa fram land er um 32.000 km.

Samkvæmt gögnum Umhverfisráðuneytisins er losun gróðurhúsalofttegunda frá fólksbílum innan við 4% af heildarlosun á landinu. Losun frá framræstu mólendi (skóglendi og ræktað land undanskilið) er aftur á móti tæp 68% af heildarlosun.

UMHVERFISÁSKORUN TOYOTA 2050

MARKMIÐ OG LEIÐIR TOYOTA Í UMHVERFISMÁLUM

Við tökum tillit til umhverfismála í allri starfsemi okkar og vinnum í anda sjálfbærrar þróunar og stuðlum þannig að betra umhverfi

Að vernda auðlindir okkar eins og vatn, rafmagn og skóga

• Að vera með trjáplöntudag Toyota þar sem starfsfólk gróðursetur plöntur á lóð fyrirtækisins í Kauptúni eða nágrenni sem mótvægi við kolefnisfótspor fyrirtækisins. 
• Að fá starfsfólk til að haga starfi sínu í samræmi við umhverfisstefnu fyrirtækisins 
• Að minnka notkun á hvern rúmmetra í rafmagni og hita 
• Að skrá inn alla eldsneytiseyðslu fyrirtækjabílanna okkar með það að markmiði að draga úr eldsneytisnotkun í samræmi við umhverfismarkmið Toyota 2050.

Að huga að öryggi starfsmanna með því að

• Að fá starfsfólk til að vinna eftir þeim leiðbeiningum sem öryggisblöðin veita okkur, með því að fá það til að kynna sér öryggisblöðin - átak í nóvember ár hvert. 
• Að viðhalda leiðbeiningum fyrir starfsmenn hvernig á að umgangast öryggiskerfið hjá Toyota og hvernig ábyrgðarmenn eigi að bregðast við útköllum.

Að virkja umhverfismál í gegn um CSR málefni okkar

• Að styðja áfram við starfsemi Skógrækarfélags Íslands og halda áfram að byggja upp Toyota skógana. 
• Að styðja áfram við starfsemi Bláa hersins við hreinsunarstarf hér á landi. 
• Að styðja við endurheimt votlendis á Íslandi.

Að gera starfsfólk meðvitaðra um umhverfismál okkar með því að

• Hvetja starfsmenn til almennrar endurvinnslu heima fyrir, ekki síður en á vinnustað, með því meðal annars að greiða fyrir endurvinnslutunnu starfsmanna.

Að leggja áherslu á að auka sölu á Hybrid bílum bæði frá Toyota og Lexus

• Að auka markvisst hlutfall Hybrid bíla í heildarsölu Toyota og Lexus ár hvert.

Við munum tryggja að öllum lagakröfum á sviði umhverfismála verði fullnægt og munum setja okkur strangari kröfur þar sem við á

Að fylgja lögum um Hollustuhætti og mengunarvarnir nr. 7/1998 og reglugerðum sem falla þar undir

• Að kynna fyrir lykilstarfsmönnum lög og reglugerðir sem varða hollustuhætti og mengunarvarnir sem snúa sérstaklega að starfsemi fyrirtækisins. 
• Taka þátt í reglulegum heimsóknum Heilbrigðiseftirliti sveitafélagsins í úttektum á starfsemi fyrirtækisins til að viðhalda starfsleyfi okkar.  
• Að vinna með Heilbrigðiseftirlitinu að úrlausnum á hugsanlegum athugasemdum sem koma frá Heilbrigðiseftirliti hverju sinni.

ÁRANGUR OKKAR Í UMHVERFISMÁLUM

Rafmagns- og hitanotkun

Árið 2017 tók Toyota í notkun hugbúnað frá Klöppum sem safnar gögnum um umhverfisþætti í starfsemi félagsins, svo sem notkun á rafmagni og heitu vatni. Með hjálp kerfisins er auðvelt að fylgjast með umhverfismarkmiðum félagsins á einföldu mælaborði sem sýnir árangur í rauntíma.
Einnig notum við orkueftirlitskerfi frá Powena til að mæla orkunotkun.

Rafmagnsnotkun hefur aukist lítillega á milli ára. Í ljósi þess að umsvif fyrirtækisins hafa stóraukist og sérstaklega á verkstæðum eins og standsetningu og almennu verkstæði þar sem mikið er unnið fram eftir, höfum við náð mjög góðum árangri í því að minnka rafmagnsnotkun.

Við mælum notkun á heitu vatni reglulega og stefnum að því að minnka hana í samræmi við umhverfismarkmið okkar.

Á árinu 2018 var mikil vinna lögð í að efla og fjölga gagnapípum í umhverfisstjórnunarkerfinu Klappir Core og þannig fækka þeim upplýsingum í umhverfisuppgjörinu sem byggðust á handvirkum skráningum. Er þetta gert til að tryggja rekjanleika upplýsinga frá upptöku gagnastraums fram í framenda Klappir Core.